Орталықта онкохирургиядағы заманауи технологиялар бойынша халықаралық шеберлік сабақтары өтеді

2026 жылғы 14–18 қыркүйек аралығында Республикалық мамандандырылған онкология және радиология ғылыми-практикалық медициналық орталығында жоғары технологиялы хирургиялық араласуларға арналған халықаралық шеберлік сабақтары өтеді.

Бағдарламаға Түркия Республикасынан шақырылған тәжірибелі мамандар қатысады:

• Prof. Dr. Fatih Altıntoprak
• Dr. Emine Sena Cünük

Оқу бағдарламасы практикалық хирургиялық жұмыс пен кәсіби тәжірибе алмасуды ұштастыра отырып, заманауи хирургиялық тәсілдерді меңгеруге және күрделі операцияларды орындау техникасын жетілдіруге бағытталған.

Бағдарлама аясында мынадай бағыттар бойынша хирургиялық араласулар мен шеберлік сабақтары өткізіледі:

• Гепатопанкреатодуоденальды хирургия — бауырда, ұйқы безінде және он екі елі ішекте орындалатын күрделі операциялар.
• Сүт безі хирургиясы — сүт безі ауруларын емдеу аясындағы заманауи хирургиялық араласулар.
• Аз инвазивті лапароскопиялық хирургия — шағын тілік арқылы орындалатын заманауи операциялық технологиялар.

Бірлескен жұмыс барысында операциялардың негізгі кезеңдеріне, оларды орындаудың техникалық ерекшеліктеріне, күрделі клиникалық жағдайларда шешім қабылдауға және науқастардың қауіпсіздігін қамтамасыз етуге ерекше көңіл бөлінеді.

Мұндай халықаралық білім беру іс-шаралары мамандардың кәсіби құзыреттерін дамытуға, озық шетелдік тәжірибені зерделеуге және заманауи хирургиялық тәсілдерді күнделікті клиникалық тәжірибеге енгізуге ықпал етеді.