Орталық пен AID International Doctors Association ынтымақтастықты талқылады

Халықаралық ынтымақтастықты одан әрі дамыту мақсатында Республикалық мамандандырылған онкология және радиология ғылыми-практикалық медицина орталығы мен AID International Doctors Association (AID) өкілдері арасында кездесу өтті. Кездесу барысында тараптар өз ұйымдарының негізгі қызмет бағыттары, халықаралық тәжірибесі және қолда бар мүмкіндіктері туралы ақпарат берді.

Сондай-ақ төтенше жағдайларға дайындық пен оларға ден қою, шұғыл медициналық көмек көрсету, медицина қызметкерлерінің біліктілігін арттыру, кадр әлеуетін дамыту және кәсіби тәжірибе алмасу мәселелері талқыланды. AID International Doctors Association ұйымның төтенше жағдайларда медициналық көмек көрсету бойынша халықаралық тәжірибесін, сондай-ақ Дүниежүзілік денсаулық сақтау ұйымының (ДДСҰ) Еуропа өңірлік бюросы тарапынан Emergency Medical Team (EMT) Type 1 Fixed ретінде ресми верификациядан өткенін таныстырды.

Кездесу қорытындысында тараптар өзара тиімді ынтымақтастықты одан әрі дамытуға қызығушылық танытып, бірлескен жобаларды жүзеге асыру, медицина қызметкерлеріне арналған оқу және біліктілік арттыру бағдарламаларын ұйымдастыру, тренингтер өткізу, тәжірибе алмасу және басқа да бірлескен бастамаларды жүзеге асыру мүмкіндіктерін қарастыруға келісті. Тараптар болашақта нақты ынтымақтастық бағыттарын айқындау және практикалық шаралар әзірлеу мақсатында жұмыс диалогтарын жалғастыруға уағдаласты.