Markaz va AID International Doctors Association hamkorlikni muhokama qildi

Xalqaro hamkorlikni yanada rivojlantirish maqsadida Respublika ixtisoslashtirilgan onkologiya va radiologiya ilmiy-amaliy tibbiyot markazi hamda AID International Doctors Association (AID) vakillari o'rtasida uchrashuv bo'lib o'tdi. Uchrashuv davomida tomonlar o'z tashkilotlarining asosiy faoliyat yo'nalishlari, xalqaro tajribasi hamda mavjud imkoniyatlari haqida ma'lumot berdilar.

Shuningdek, favqulodda vaziyatlarga tayyorgarlik ko'rish va ularga javob choralarini ko'rish, shoshilinch tibbiy yordam ko'rsatish, tibbiyot xodimlarining malakasini oshirish, kadrlar salohiyatini rivojlantirish hamda professional tajriba almashish masalalari muhokama qilindi. AID International Doctors Association tomonidan tashkilotning favqulodda vaziyatlarda tibbiy yordam ko'rsatish bo'yicha xalqaro tajribasi, shuningdek, Jahon sog'liqni saqlash tashkiloti (JSST)ning Yevropa mintaqaviy byurosi tomonidan Emergency Medical Team (EMT) Type 1 Fixed sifatida rasmiy verifikatsiya qilingani haqida ma'lumot berildi.

Uchrashuv yakunida tomonlar o'zaro manfaatli hamkorlikni yanada rivojlantirishga qiziqish bildirib, qo'shma loyihalarni amalga oshirish, tibbiyot xodimlari uchun o'quv va malaka oshirish dasturlarini tashkil etish, treninglar o'tkazish, tajriba almashish hamda boshqa qo'shma tashabbuslarni amalga oshirish imkoniyatlarini ko'rib chiqishga kelishib oldilar. Tomonlar kelgusida aniq hamkorlik yo'nalishlarini belgilash va amaliy chora-tadbirlarni ishlab chiqish maqsadida ishchi muloqotlarni davom ettirishga kelishib oldilar.