Rasmiy munosabat: bepul xizmat tugatilgani yo‘q, yo‘naltirish tartibi o‘zgardi

Ijtimoiy tarmoqlarda Respublika onkologiya markazida Toshkent shahri bemorlari uchun bepul xizmat tugatilgani haqida xabarlar tarqaldi. Markaz quyidagilarni ma’lum qiladi.

Avvalo, bu xabarlar haqiqatga to‘g‘ri kelmaydi. Respublika ixtisoslashtirilgan onkologiya va radiologiya ilmiy-amaliy tibbiyot markazida bepul xizmat tugatilgani yo‘q — faqat bemorni yo‘naltirish tartibi o‘zgardi.

Avval poytaxtda yashovchi bemorlar markazning shahar filialiga qog‘oz yo‘llanma bilan kelardi. Endi esa ular O‘zbekistonning boshqa barcha hududlaridagi kabi DMED tizimi orqali elektron yo‘llanma asosida yo‘naltirilmoqda.

Bemor marshruti

• Bemor avvalo oilaviy poliklinikaga murojaat qiladi; u yerda qon tahlili, rentgen va UTT bepul amalga oshiriladi.
• Tuman (shahar) onkologi ko‘rigidan o‘tib, aniqlashtiruvchi tekshiruvlar bajariladi.
• DMED tizimi orqali elektron yo‘llanma shakllantiriladi.
• Yo‘llanma onkologiya markazida tasdiqlanadi. Shundan so‘ng bepul ko‘rik, kontrastli MSKT/MRT, PET-KT, gistologiya va IGX, hamda bepul davolash (kimyoterapiya, nur terapiyasi, jarrohlik) o‘tkaziladi.

Tartib nega o‘zgartirildi?

Avvalgi tartibda aksariyat bemorlar DMED orqali faqat 027-shakl bilan, oilaviy va ko‘p tarmoqli markaziy poliklinikalarda zarur tekshiruvlardan o‘tmasdan markazga yuborilgan. Natijada markaz poliklinikasi ortiqcha yuklama bilan ishlab, hududda bajarilishi lozim tekshiruvlarni ham Davlat tibbiy sug‘urtasi jamg‘armasi mablag‘lari hisobidan o‘tkazishga majbur bo‘lgan. Yuqori texnologik yordamga mo‘ljallangan mablag‘ birlamchi tekshiruvlarga sarflangan, Toshkent bemorini hududiy yoki respublika darajasida davolash kerakligini aniqlash qiyinlashgan.

Elektron yo‘llanmaga o‘tish bu muammolarni bartaraf etmoqda: bemor tekshiruvlarni takrorlamaydi, mablag‘ haqiqatan yuqori texnologik yordamga yo‘naltiriladi, har bir bemor marshruti elektron tizimda shaffof ko‘rinadi.

Muhimi, yo‘llanma bilan qabul qilingan bemordan diagnostika, davolash, dori va sarf materiallari uchun pul talab qilish, shuningdek ularni bemor hisobidan sotib olish taqiqlangan. Xizmat faqat yo‘llanmasiz rejali murojaatda pullik asosda ko‘rsatiladi. Shoshilinch yordam esa doimo yo‘llanmasiz va bepul.

Hurmatli fuqarolar, yo‘llanma bilan kelganingizda sizdan pul yoki dori sotib olish talab qilinsa, markazning 1303 qisqa raqamli ishonch telefoniga qo‘ng‘iroq qiling. Har bir murojaat o‘z vaqtida ko‘rib chiqiladi.

Respublika ixtisoslashtirilgan onkologiya va radiologiya ilmiy-amaliy tibbiyot markazi.