Densawlıqtı saqlaw ministri basshılığındaǵı delegaciya Orayǵa keldi; Baqlaw keńesiniń nawbettegi jıynalısı ótti

Búgin Respublikalıq ixtisoslastırılğan onkologiya hám radiologiya ilimiy-ámeliy medicina orayına — Gustave Roussy International Uzbekistan medicina orayına Densawlıqtı saqlaw ministri Eldor Adilov basshılığındaǵı delegaciya keldi hám Oraydıń Baqlaw keńesiniń nawbettegi jıynalısı ótti.

Is-shaǵa Baqlaw keńesi aǵzaları — Milliy medicina orayı direktori Maqsud Saidov, Mámleketlik medicinalıq sug'urta jámǵarmasınıń atqarıwshı direktorı Zohid Shavkatovich Ermatov, «Health Management» oray basqarıw kompaniyası direktorı Aylin Akin Hasret, sonday-aq keńestiń basqa aǵzaları qatnastı.

Sapar dawamında delegaciya Orayda jaratılǵan házirgi zaman medicinalıq infrastrukturası, bemarlarǵa kórsetilip atırǵan xızmet sapası, ilǵar diagnostika hám emlew imkaniyatları hám Oray xızmetin jáne de rawajlandırıw perspektivaları menen tanıstı.

Búgin Oray Franciyanıń abıraylı Gustave Roussy instituti menen hámkorlıqta «Gustave Roussy International Uzbekistan» brendi hám xalıqaralıq basqarıw tiykarında xızmet kórsetip atırǵanı atap ótildi. Hámkorlıq sheńberinde medicinalıq mekemeni basqarıwdıń házirgi zaman standartları hám sapanı qadaǵalaw sisteması engizilmekte, 2030-jılǵa shekem 100 jas onkolog-xirurgtıń Franciya klinikalarında bilikliligin asırıwı rejelestirilgen.

Baqlaw keńesi jıynalısında talqılanǵan máseleler

• Oraydıń 2026-jıldaǵı xızmeti;
• aymaqlıq filiallar menen hámkorlıqtı rawajlandırıw;
• medicinalıq xızmet sapasın asırıw;
• sanlastırıw;
• házirgi zaman diagnostika úskenelerinen nátiyjeli paydalanıw;
• kadrlar tayarlaw, sonıń ishinde radiologiya boyınsha;
• patomorfologiya xızmetin rawajlandırıw;
• Mámleketlik medicinalıq sug'urta jámǵarması jollanbası tiykarında jiberilgen bemarlardıń emleniw shıǵınların qaplaw;
• hayallar onkologiyalıq keselliklerin qadaǵalawdı jetilistiriw;
• onkologiyalıq dári-dármaqlardan paydalanıw hám qadaǵalaw boyınsha Milliy komissiya dúziw haqqında usınıslar.

Ústin wazıypalar

• Gustave Roussy instituti (Franciya) talapları tiykarında onkologiyalıq bemarlarǵa medicinalıq járdem kórsetiwdiń birden-bir standartların engiziw;
• Oray laboratoriyasın ortalıqlastırılǵan referens laboratoriyaǵa aylandırıw;
• shıpaxana tiykarında Milliy referens patomorfologiya orayın dúziw;
• onkologiyalıq dári-dármaqlardan paydalanıw sistemasın jetilistiriw.

Jıynalıs juwmaǵında xalıqqa kórsetilip atırǵan onkologiyalıq medicinalıq járdem sapasın jáne de asırıwǵa, házirgi zaman medicinalıq texnologiyalardı keń engiziwge hám Oray xızmetiniń nátiyjeliligin kóteriwge baǵdarlanǵan aniq wazıypalar hám ústin baǵdarlar belgilep alındı.

Oraydıń baspasóz xızmeti