Markaz va hududiy filiallar ishtirokida navbatdagi MDT yig'ilishlari o'tkazildi

Respublika ixtisoslashtirilgan onkologiya va radiologiya ilmiy-amaliy tibbiyot markazi (RIOvaRIATM) hamda uning hududiy filiallari o'rtasida navbatdagi multidisiplinar konsilium (MDT) yig'ilishlari bo'lib o'tdi.

Yig'ilishlar doirasida ikki yo'nalish bo'yicha alohida MDT muhokamalari tashkil etildi:

• birinchi MDTda onkourologiya yo'nalishidagi murakkab klinik holatlar;
• ikkinchi MDTda esa onkoginekologiya yo'nalishida davolanayotgan bemorlarning klinik holatlari batafsil ko'rib chiqildi.

Konsiliumlarda Markaz va uning hududiy filiallarida faoliyat yuritayotgan onkourologlar, onkoginekologlar, kimyoterapevtlar, radiologlar va patomorfologlar, shuningdek, xorijdan maxsus taklif etilgan professor-patomorfolog oflayn va onlayn shakllarda ishtirok etdilar.

Muhokamalar davomida har bir bemorning klinik, instrumental, laborator va morfologik tekshiruv natijalari atroflicha tahlil qilindi hamda turli yo'nalish mutaxassislarining xulosalari o'zaro muvofiqlashtirildi. Ayniqsa murakkab klinik holatlarda tashxisni aniqlashtirish, kasallik bosqichini to'g'ri baholash, qo'shimcha tekshiruvlar hajmini belgilash va har bir bemor uchun eng maqbul individual davolash taktikasini tanlash masalalariga alohida e'tibor qaratildi.

Yig'ilishlarning asosiy maqsadi — onkologik bemorlarga ko'rsatilayotgan tibbiy yordam sifatini yanada oshirish, murakkab holatlarda multidisiplinar yondashuvni ta'minlash, Markaz va hududiy filiallar o'rtasidagi professional hamkorlikni mustahkamlash hamda ilg'or xalqaro tajribalarni amaliyotga izchil joriy etishdan iborat.