08 Sen 2026
Markaz birinchi marta Edinburgdagi ICEM 2026 konferensiyasida ishtirok etmoqda
Markaz 6-10 sentyabr kunlari Shotlandiyaning Edinburg shahrida o'tayotgan 14-Xalqaro Ekologik Mutagenlar Konferensiyasi (ICEM 2026)da birinchi marta o'z stendi bilan qatnashib, O'zbekistondagi genetik tadqiqotlar natijalarini taqdim etmoqda.
Respublika ixtisoslashtirilgan onkologiya va radiologiya ilmiy-amaliy tibbiyot markazi 6-10 sentyabr kunlari Shotlandiyaning Edinburg shahridagi Edinburg Xalqaro Konferensiya Markazida (EICC) o'tkazilayotgan 14-Xalqaro Ekologik Mutagenlar Konferensiyasi — ICEM 2026da birinchi marta o'z stendi bilan ishtirok etmoqda.
Markaz konferensiyada O'zbekistondagi genetik tadqiqotlar yo'nalishidagi ilmiy natijalarni taqdim etmoqda. Delegatsiya tarkibida:
- Dilshod Egamberdiyev — Strategik rivojlanish bo'yicha direktor o'rinbosari
- Deniz Akin — Molekulyar-genetik laboratoriya mudiri
ICEM 2026 mavzusi: "Yangi texnologiyalarni an'anaviy genotoksikologik yondashuvlar bilan uyg'unlashtirish orqali real muammolarni yechish". Dunyoning turli mamlakatlaridan kelgan olimlar genom xavfsizligi, sun'iy intellekt va zamonaviy bioinformatika sohalaridagi so'nggi yutuqlarni muhokama qilmoqda.
Ushbu muhim tadbirda qatnashish orqali Markaz xalqaro ilmiy hamkorlikni kengaytirish va O'zbekistonda genetik tadqiqotlar salohiyatini rivojlantirish yo'lida ish olib bormoqda.