Markaz mutaxassislari «O‘zbekiston–Germaniya» III tibbiyot forumida ishtirok etdi

Respublika ixtisoslashtirilgan onkologiya va radiologiya ilmiy-amaliy tibbiyot markazi, xalqaro Gustave Roussy International O‘zbekiston tibbiyot markazi mutaxassislari poytaxtimizda bo‘lib o‘tayotgan «O‘zbekiston–Germaniya» III tibbiyot forumida faol va samarali ishtirok etdi.

Forum doirasida O‘zbekiston va Germaniyaning yetakchi tibbiyot muassasalari vakillari, olimlar va ekspertlar ishtirokida zamonaviy tibbiyotning dolzarb yo‘nalishlari, xususan, yuqori texnologik jarrohlik amaliyotlari, ilg‘or davolash usullari, tibbiy ta’lim va ilmiy hamkorlik masalalari muhokama qilindi.

Markaz mutaxassislari panel sessiyalarida ishtirok etib, O‘zbekistonda onkologik va jarrohlik xizmatlarini rivojlantirish borasidagi tajriba bilan o‘rtoqlashdi, germaniyalik hamkasblar bilan zamonaviy texnologiyalarni amaliyotga joriy etish, mutaxassislar malakasini oshirish va qo‘shma ilmiy-amaliy loyihalarni rivojlantirish bo‘yicha fikr almashdi.

Bunday xalqaro muloqotlar O‘zbekiston tibbiyotida ilg‘or tajribalarni joriy etish, professional aloqalarni mustahkamlash hamda bemorlarga ko‘rsatilayotgan tibbiy yordam sifatini yanada oshirishga xizmat qiladi.

RIO va RIATM matbuot xizmati