Mustaqillikning 35 yilligi munosabati bilan Markaz xodimlari taqdirlandi

O'zbekiston Respublikasi Mustaqilligining 35 yilligi munosabati bilan Respublika ixtisoslashtirilgan onkologiya va radiologiya ilmiy-amaliy tibbiyot markazi Andijon viloyat filialida "Yagona Vatan, yagona xalq bo'lib, yangi hayot va kelajak yaratamiz!" shiori ostida bayram tadbiri tashkil etildi. Filial faoliyatida samarali mehnat qilib, fidoyiligi va tashabbuskorligi bilan namuna ko'rsatgan 17 nafar xodim Kasaba uyushmasi qo'mitasi tomonidan tashakkurnoma hamda esdalik sovg'alari bilan taqdirlandi; shuningdek, 14 nafar xodimga pul mukofotlari topshirildi.

Sog'liqni saqlash tizimi rivojiga munosib hissa qo'shgan, ko'p yillar davomida sidqidildan va fidokorona mehnat qilgan, yuksak kasbiy mahorati hamda namunali faoliyati bilan jamoa orasida hurmat qozongan bir guruh xodim O'zbekiston Respublikasi Prezidenti nomidan "O'zbekiston Respublikasi mustaqilligining 35 yilligi" esdalik ko'krak nishoni bilan taqdirlandi.

Yuksak mukofotlarni Markaz direktori Sedat Kaya tantanali ravishda o'z egalariga topshirdi. Mazkur e'tirof xodimlarning inson salomatligini asrash, aholiga sifatli tibbiy xizmat ko'rsatish va mamlakatimiz onkologiya xizmatini rivojlantirish yo'lidagi fidokorona mehnatiga berilgan yuksak bahodir.